Bapikie palito hati
nanang saribu aka
Taraso lamak jan dilulue
Taraso pahik jan diluahkan
Bajalan injek injek langkah
Bakato paliharo lidah
Hiduik jan bak pucuak aru
Maikuik kama kareh angin
Iyokan nan di urang 
Lalukan nan nan di awak
Tunjuak luruih kalingkiang bakaik
Guntianglah baju nak rang Guguak
Dijaik jan disudahkan
Bao kakincia lah dahulu
Kok manih jan diraguak
Kok paik jan diluahkan
Baok bapikia lah dulu

Kilek camin lah ka muko
Kilek baliuang la ka kaki
Kilek kato lah kahati
Tahu diombak nan basabuang
Tahu diangin nan basiuik
Tahu dirantiang kamalantiang
Tahu diduri nan ka mancucuak
Tahu didahan nan ka mahimpok
Tahu ditunggue nan ka manaruang
Ingek ingek sabalun kanai
Nan dibawah kok mahimpik
Gabakdihulu tando ka hujan

Manusia tahan kieh
Binantang tahan palu
Tagisia labiah bak kanai
Tasingguang labiah bak jadi

Diagak mako diagiah
Dibaliak mako dibalah
Bajalan manuju bateh
Balaie manuju pulau

Kuaik rumah karano sandi
Rusak sandi rumah binaso
Kuaik bangso karano budi
Rusak budi hancualah bangso

Basilek diujuang lidah
Malangkah dipangka karih
Bamain diujuang padang
Tahan dikieh kato putuih

Tahu dikilek sarato bayang
Tahu digelek kato habih
Tahu diherang gendeng
Sarato kurenah jo bainah

Adaik mudo manangguang rindu
Adaik tuo manangguang ragam
Kok condong jan kamari rabah
Luruih tantang baih adaik

Budi jan tajua
Paham jan tagadai
Kok kayo kayo dek budi
Nak mulie mulie dek baso
Budi nan indak katinjauan
Paham nan indak kamaliangan

Iman nan tak buliah ratak
Kamudi nan tak buliah patah
Padoman nan tak buliah tagelek
Haluan nan tak buliah barubah

Sayang jo anak di lancuik
Sayang jo kampuang ditinggakan
Ujan ameh dinagari urang
Ujanbatu dinagari awak
Kampuang nan jauah dibantu juo

Mati batungkek budi
Hiduik bakarilahan
Dipakai raso jo pareso
Ditimbang jo nyao badan

Nak luruih rantangkan tali
Nak tinggi tingkekkan budi
Nak aluih babaso basi
Nak elok lapangkan hati
Nak mulie tapek'i janji
Nak taguah paham dikunci
Nak kayo kuaik mancari
Nak tuah batabue budi
Nak namo tinggakan jaso
Nak pandai rajin baraja

Bilo kato lah ditanam dihati
Jalehlah sagalo rahasio alam
Jikok diajun sitamba lamo
Sabarih indak buliah ilang
Satitiak bapantang lupo

Nan sakapa alah diambiak urang
Nan sapinjik tingga diawak
Walau dibalun sabalun kuku
Jikok dikambang saleba alam
Walau sagadang bijo labu
Bumi jo langik ado didalam

Latiak latiak tabang ka pinang
Singgah manyasok bungo rayo
Aie satitik dalam pinang
Sinan bamain ikan rayo

Baburu babi ka batu balang
Mandapek buluah jo rotan
Guru mati kitablah hilang
Sasek kasia ditanyokan

Laka jo dulang didalam lubuak
Pandan baduri malendo jalan
Aka hilang paham tatumbuak
Basarah diri pado tuhan

Kahiliah jalan ka Padang
Ka mudiak jalan ka Ulak-an
Kok musuah indak dihadang
Kok basuo pantang di-ilakkan

Kalo ndak basuo dijalannyo
Namuah bapua pua dagiang
Namuah bakacau kacau darah
Tando sabana laki laki

Elok ranahnyo Minangkabau
Rupo karambia tinggi tinggi
Cando rumpuik gantie gantielan
Rupo pinangnyo linggayuran
Bukik baririk kiri kanan
Gunuang Marapi jo Singgalang
Tandikek jo gunuang Sago
Pasaman jo gunuang Talang
Aianyo janiah ikannyo jinak

Laweh alamnyo bakeh tagak
Sawah batumpuak di nan data
Ladang babidang di nan lereang
Sawah bajanjang banda buatan
Sawah ladang labuah nan pasa
Taranak kambang padi manjadi
Buah jaguang maampai suto
Padi masak jaguang maupiah
Lah masak padi disawah
Padi diladang manguniang pulo
Ladang tabu manyintak rueh
Pisang badukuang ditandannyo
Antimun mangarang bungo
Batang labu marangtang tali
Buah taruang ayun ayunan
Buah lado manbintang timue
Buah kacang taji tajian
Anak rancak minantu malin

Sajak durian ditakuak rajo
Sialang balantak basi
Buayo nan putiah daguak
Sirangkak nan badangkang
Sampai taratak aia hitam
Sampai riak nan badabua
Sampai kabateh indrapuro
Sampai ka siak indragiri
Hinggo sipisak pisau hanyuik
Sampai sikilang aia bangih.

Dima asa titiak palito
Dibaliak telong nan batali
Dimano asa niniak kito
Dari lereang gunuang marapi
Di galundi nan baselo
Dakek bukik siguntang guntang
Di sinan lurah satungka banang
Sinan lurah ndak baraia
Disinan bukik ndak barangin
Sinanlah banta barayun
Disinan batu hamparan putiah

Panakiak pisau sirauik
Ambiak galah batang lintabuang
Salodang ambiak ka nyiru
Nan satitiak jadikan lauik
Nan sakapa jadikan gunuang
Alam takambang jadikan guru

Bungka ganok manahan cubo
Ameh batu manahan uji
Naraco pantang bapaliang
Anak nagari sakato hati
Satapak bapantang suruik
Salangkah pantang kumbali

Adopun kasadonyo kito di Minangkabau 
Nan disungkuik langik nan ditanai bumi
Nan saedaran kuliliang gunuang marapi
Nan mahuni daerah bagian baraik
Samato lah banamo pulau andaleh
Bapandirian bak kato nan tuo tuo
Pulai juo nan batingkek naiak
Maninggakan rueh jo buku
Manusia nan bapangkek turun
Maninggakan adaik jo limbago
Gajah mati maninggakan gadiang
Harimau mati maninggakan balang
Manusia mati maninggakan jaso
Lah jadi kabiasaan bagi kito
Rantau nan barajo
Luhak nan bapanghulu

Lah dibiasokan pulo dek adaik kito
Adaik nagari nagari nan batuo
Mambuang sagalo nan buruak
Mamakai sagalo nan baiak
Nan sasuai pulo jo kato nabi
Malarang urang babuek jahek
Manyuruah urang babuek baiak

Mulai sajak maso dahulu
Sampai pulo pado maso kini
Sajak samulo sumua di gali
Sajak mulo nagari dihuni
Adaik dipakai, syarak nan lazim
Duo hukum nan lah digunokan
Hukum adaik jo hukum Syarak